Icyumweru cyahariwe amazi: Abanyarwanda bibukijwe kubungabunga imigezi

Abanyarwanda baributswa kubungabunga amasoko y’amazi mu gihe hitegurwa umunsi mpuzamahanga wo kwita ku mazi meza tariki 20 Werurwe 2019.

Leta y’uRwanda itangaza ko hari byinshi bimaze gukorwa mu kugeza amazi meza ku baturage.

Mu nama mpuzamahanga iteraniye i Kigali ku kwita ku mazi n’ibidukikije, Minisitiri w’ibidukikije Dr Vincent Biruta, yavuze ko uRwanda  rudakwiye kugenda biguruntege mu gihe amazi ataragera kuri buri wese, nubwo hari intambwe nini imaze guterwa.

Ni inama izamara iminsi ibiri ifite insanganyamatsiko igira iti “Leaving no one behind” (Nta n’umwe uhejwe). Minisitiri Biruta  yavuze ko kwita ku mazi bisaba kwita ku masoko yayo abantu birinda kuyatoba kandi bakarwanya isuri.

Yavuze ko ari uburyo bwo guhuza abakoresha amazi n’abahanga mu kuyatunganya bungurana ibitekerezo hagamijwe gukuraho inzitizi za hato na hato zigenda mu gusukura amazi no kuyageza ku baturage no kuyitaho.

Tetero François, umuyobozi ushinzwe umutungo kamere w’amazi  avuga ko icyumweru cyahariwe amazi ari igikorwa gisanzwe kiba buri mwanaka bagakora ubukangurambaga mu gucunga umutungokamere w’amazi.

Agira ati “Iki cyumweru cyasanze dufite imbogamizi  zitandukanye  zijyanye n’imicungire y’amazi,  hakaba hinganjemo isuri, cyane cyane imyuzure yakunze kugaragara umwaka ushize ndetse no kuba hari henshi hataboneka amazi ahagije, cyane cyane igice cy’Iburasirazuba.”

Akomeza avuga ko kugira ngo ibyo bibazo bikemuke hari umushinga wo kubungabunga kimwe mu byogogo bya Nyabarongo, umwe mu migezi minini iri mu Rwanda ufasha mu kubaka ingomero z’amashanyarazi no gutunganya amazi meza.

Muri iki cyumweru hazatangizwa umushinga wo kubungabunga bimwe mu bice by’imigezi yisuka muri Nyabarongo nk’uko bisanzwe bikorwa ku yindi irimo na Sebeya.

Mu Bindi bikorwa uRwanda rwimirije imbere harimo kubungabunga umugezi wa Nyabarongo no guca amaterasi, gutera amashyamba nogutera ibiti bivangwa n’imyaka ku bufatanye n’abaturage.

Iyi nama yitabiriwe n’abayobozi bafite mu nshingano zabo gukurikirana amazi, kuva ku rwego rw’umurenge kugeza ku rwego rw’igihugu hamwe n’abafatanyabikorwa bafite amazi mu nshingano zabo harimo n’Umushinga Hinga Weze uterwa inkunga na USAID.

Umushinga Hinga Weze mu nkunga yawo yo gufasha abanyarwanda kuhira wiyemeje kuzageza amazi ku baturage barenga 4000 hifashishijwe ikoranabuhanga ry’imirasire y’izuba n’amamashini mu turere twa Bugesera, Ngoma, Gatsibo na Kayonza twakunze kwibasirwa n’amapfa.

Guverinoma y’uRwanda ifite gahunda yo kwimura abaturage mu bishanga mu rwego two kutabangamira ibidukikije no kuvana mu kaga ubuzima bwabo.

Elias Hakizimana

theinspirerpublications@gmail.com

 

4,538 total views, 1 views today

Spread this story

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *