Abatuye i Nyagatare basabwe kutarambiriza ku nkwi gusa nk’uburyo bwo gutekesha

Sosiyete y’u Rwanda ishinzwe ingufu (REG), yashishikarije abaturage bo mu Karere ka Nyagatare kutarambiriza ku nkwi gusa nk’uburyo bwo guteka, ahubwo bagakoresha Gaz n’imbabura zirondereza ibicanwa mu rwego rwo kurengera ibidukikije.

Ubu butumwa bwatangiye mu Murenge wa Rwimiyaga ku wa 12 Werurwe ubwo REG n’abafatanyabikorwa bayo muri gahunda y’ingufu zitekeshwa bakanguriraga abaturage kwifashisha uburyo burondereza ibicanwa.

Basobanuriwe ko gutekesha uburyo bwa gakondo (ku mabuye atatu) buhenda, bwangiza ibidukikije buteza ingaruka ku ihindagurika ry’ibihe, bwangiza umwuka uhumekwa kandi umwotsi uvamo ugira ingaruka ku buzima bw’abantu n’izindi.

Umuyobozi ushinzwe ibicanwa muri REG, Niyonsaba Oreste, yababwiye ko hari ubundi buryo bwo guteka bakwifashisha butari ubwa gakondo burimo rondereza zigezweho zirondereza ibicanwa cyangwa Gaz.

Ati “Abantu bumva ko bafata amabuye atatu bagatekeraho nta kibazo ariko uko duteka tukarya, ejo tukongera, tuba turimo kwangiza ibidukikije.Nidukomeza gushyiramo imbaraga bamwe bagatekesha Gaz, abandi bagakoresha amashanyarazi, abasigaye bagakoresha rondereza na biogaz, amashyamba yacu azongera akure.”

Abaturage bavuze ko bagorwa no kubona ibicanwa ku buryo Gaz n’imbabura zibirondereza zabafasha/ Ifoto ya IGIHE

Intara y’Iburasirazuba, cyane cyane mu Karere ka Nyagatare ni kamwe mu tugira imvura nke bishobora kuba biterwa n’uko nta mashyamba ahagije gafite.

Umukozi w’ishami rya REG rishinzwe ingufu zikomoka ku bimera, Karera Issa, yababwiye ati “Igiti gikenerwa mu bintu byinshi uhereye ku buzima, gifasha n’amatungo kugira ngo abeho. Muzi umumaro wacyo ku matungo. Bityo rero ntabwo gikwiriye kuba aricyo turambirizaho kugira ngo tubashe gucana.”

Umukozi w’ishami rya REG rishinzwe ingufu zikomoka ku bimera, Karera Issa, yasabye abaturage gukoresha ubundi buryo bwo guteka butari inkwi

Umuyobozi wa Kigali Gaz Traders Ltd, Ndagijimana Emmanuel, yababwiye ko bashobora kwifashisha Gaz mu guteka kuko ihendutse ugereranyije n’inkwi cyangwa amakara, itangiza ibidukikije kandi ikanagira isuku.

Ndagijimana yavuze ko kugura Gaz yo gutekesha bisaba nibura 34 000Frw ariko ko ku bufatanye n’Imirenge Sacco, abadashoboye kuyatangira rimwe bashobora kuyihabwa ku nguzanyo bakayishyura gahoro gahoro.

Umuyobozi w’ikigo gikora kikanacuruza imbabura zirondereza ibicanwa (Geni Green Solutions Ltd), Turahirwa Obadia, yabamurikiye ubwoko burimo iyitwa Ngufu na Songa zose zihariye mu kurondereza ibicanwa ku kigero cya 20-50% kandi zikaramba.

Yababwiye ko nubwo imbabura zisanzwe zigura hagati ya 700-1,500Frw, izabo zikagura ibihumbi 15-22Frw, ugenzuye neza usanga zihendutse inshuro icyenda ugereranyije n’igihe izisanzwe zimara, ingano y’amakara zikoresha n’ibindi.

Urugero ku rugo ruteka ku mbabura igura 1,500Frw imara hagati y’amezi 6-12, ngo rukoresha imifuka ibiri y’amakara mu kwezi, rugasabwa nibura 18,000Frw mu gihe nk’imbabura ya Ngufu imara hagati y’amezi 48-60, urugo rwayiguze ruzigama byibuze ibiro 14 by’amakara by’amafaranga 3,600Frw ku kwezi.

Bamwe mu batuye uyu Murenge bavuze ko ubu buryo ari bwiza, nk’uko Niyitanga Emmanuel wo mu Kagari ka Rwimiyaga, Umurenge wa Rwimiyaga yabisobanuye.

Ati “Ubu buryo batweretse ni bwiza kuko urebye hano ibicanwa biraduhenda kandi kugira ngo uzanabibone ni ikibazo. Abenshi bacana ibikenyeri, hari n’aho bacana amashara. Ubu buryo nibwo bwiza kandi bwatworohera, nta n’umwanda bwaba bufite.”

Namitondero Speciose yagize “Buriya buryo twumvise ari bwiza ku buryo bwadufasha hano i Rwimiyaga kuko iyo ari igihe cy’imvura tubura ikintu ducana ndetse tukanabwirirwa, ugasanga twahangayitse ariko tubonye nka Gaz cyangwa ziriya mbabura byadufasha.”

Inyigo ya REG igaragaza kugera mu mpera za 2017, abanyarwanda 10 bari hamwe, umunani baba batekesha inkwi, barimo umwe cyangwa babiri bazitekesha bifashishije rondereza.

Ibyo ngo bigaragaza ko hatagize igikorwa byagera mu 2030 nta biti cyangwa ishyamba by’abigenga byaba bikibarizwa ku butaka bw’u Rwanda.

Abanyarwanda bakoresha amashyiga arondereza ibicanwa bangana na 13%, abakoresha inkwi ni 79% naho 17,4% bakoresha amakara.

U Rwanda rwihaye icyerekezo cy’uko mu 2024 ruzaba rufite abaturage 42% bakoresha inkwi n’amakara.

Inkuru ya IGIHE.COM

3,443 total views, 2 views today

Spread this story

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *