Abangavu n’ingimbi bashobora kujya baboneza urubyaro

Minisitiri w’Intebe Dr Ngirente Edouard yabwiye abasenateri ko hari guhindurwa itegeko ryakumiraga abangavu n’ingimbi kuri serivisi zo kuboneza urubyaro, mu gihe bikomeje kugaragara ko umubare w’abaterwa inda wiyongera.

Byatangajwe kuri uyu wa Kane ubwo Dr Ngirente yari imbere ya Sena, asobanura ingamba za Guverinoma y’u Rwanda zijyanye no kunoza gahunda zo kuboneza urubyaro.

Abasenateri bagaragaje ko bizagora u Rwanda kugera ku ntego rwifuza yo kugeza kuri bose serivisi zo kuboneza urubyaro, mu gihe ingimbi n’abangavu bataruzuza imyaka y’ubukure batemerewe kwifatira icyemezo kuri izo serivisi.

Amategeko u Rwanda rugenderaho nk’iryerekeye ubuzima bw’imyororokere y’abantu, ntiryemera ko abana bataruzuza imyaka 18 y’ubukure bifatira icyemezo ku kuboneza urubyaro.

Kuri ubu kuboneza urubyaro mu Rwanda biri hejuru ya 50 %, intego akaba ari ukugera nibura kuri 6o % mu 2024. Ubu umugore w’umunyarwanda abarirwa abana bane, intego akaba ari ukugera ku bana babiri mu 2050.

Abasenateri bagaragaje ko izo ntego zishobora gukomwa mu nkokora no kuba urubyiruko rwose rudafite ububasha bwo kubona serivisi zo kuboneza urubyaro.

Senateri Ntawukuriryayo Jean Damascène yagize ati “Amategeko dukoresha nayo adutera ibibazo. Dufite abana ibihumbi 17 babyaye bafite imyaka 15 kugera kuri 19. Itegeko tugenderaho baravuga ngo umwana utarageza ku myaka 18 ntashobora gufata icyemezo kijyanye no kubyara. Ni ukuvuga ko adashobora gukoresha uburyo bwo kuboneza urubyaro.”

Yavuze ko mu mavuriro menshi basuye, basanze urubyiruko rutaruzuza iyo myaka rudahabwa imiti yo kuboneza urubyaro.

Senateri Musabeyezu Narcisse yavuze ko ibyo bigira ingaruka no mu mashuri kuko bituma abarimu batinjira neza mu nyigisho zo kuboneza urubyaro.

Ati “Dufite abarimu batinya kwigisha iri somo, banaryigisha bakigisha ubumenyi (sciences) ntibigishe ku buzima. Batanga ikizamini ku buzima bw’imyororokere, bagashushanya umwana agatsinda ariko yagera muri Kaminuza ukabona yatwaye inda.”

Yakomeje agira ati “Hari itegeko ridaha abana bacu kwifatira ibyemezo, ridatuma na mwalimu ashobora kubabwira ibyo bagomba gukoresha kuko badashobora kubikoresha kandi batifatira ibyemezo. Niyo mpamvu mubona tugira abana b’imyaka 12 cyangwa 13 batwara inda.”

Minisitiri w’Intebe Dr Ngirente yavuze ko n’urubyiruko rwabandikiye rubasaga guhindura itegeko, kandi ngo batangiye kurihindura.

Ati “Itegeko turarizi turi kurihindura kuko twasanze ribangamye. N’umwarimu iyo agiye kwigisha aravuga ati ‘niba utagejeje imyaka sinabikwigisha kuko bisaba ko nimbikwigisha ukajya gushaka izo serivizi urajyana n’umubyeyi wawe kandi nta burenganzira yampaye.”

Umuyobozi w’Umuryango ugamije guteza imbere ubuzima (Health Development Initiative, HDI), Dr Kagaba Aflodis muri Kamena uyu mwaka yabwiye IGIHE ko urubyiruko rukwiriye koroherezwa kubona imiti yo kuboneza urubyaro.

Yagize ati “Niba ufite urubyiruko rwatangiye gukora imibonano mpuzabitsina ni ngombwa ko rwikingira, ni ngombwa ko babona uburyo bwo kuringaniza urubyaro kugira ngo twirinde inda zitifuzwa.”

Mu 1966, abaturarwanda bageraga kuri miliyoni eshatu. Mu 1988 u Rwanda rwari rutuwe n’abaturage miliyoni esheshatu, mu gihe mu mwaka wa 2018 rutuwe n’abasaga miliyoni 12.

Ibimenyetso byerekana ko bazakomeza kwiyongera ku buryo mu 2032 bazaba bageze kuri miliyoni 16.9 mu gihe baba biyongereye cyane, cyangwa miliyoni 15.4 baramutse baboneje urubyaro.

Igihe.com

4,050 total views, 4 views today

Spread this story

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *