Police Handball Club irakoza imitwe y’intoki ku gikombe cya shampiyona

RNP.

Mu gihe hasigaye umukino umwe gusa ngo shampiyona y’icyiciro cya mbere mu mukino wa Handball hano mu Rwanda irangire, Police Handball Club kuri uyu wa gatandatu taliki ya 01 nzeri 2018 yatsinze ikipe ya ADEGI Gituza amanota 35 kuri 32; uyu  umukino wabereye mu karere ka gatsibo wongereye amahirwe ikipe ya Police Handball Club yo kwegukana igikombe cya shampiyona.

Ni umukino ikipe ya Police handball club yakinnye ishaka kuwutsinda kuko yashakaga gukomeza kuyobora urutonde rwa shampiyona dore ko kuva iyi shampiyona ya handball yatangira yakomeje kugenda yitwara neza ku bibuga bitandukanye

Umutoza mukuru w’ikipe ya Police handball club Dismas Turatsinze aganira n’itangazamakuru yavuze ko bari bafite ishyaka ryo gutsinda uyu mukino kugirango batazongera kwirara nkuko byagenze umwaka ushize bigatuma batsindwarwa ku mukino wa nyuma bigatuma batakaza igikombe cya shampiyona.

Yagize ati” Twashyize imbaraga muri uyu mukino ubanziriza uwa nyuma kugirango abakinnyi bagumane morale yo kuzitwara neza ku mukino usoza shampiyona kuko, ni nawo uzerekana ikipe izatwara igikombe kandi ntitwifuza kongera gutsindirwa ku mukino wa nyuma nkuko byatugendekeye umwaka ushize”.

Yakomeje agira ati” Nibyo tuyoboye urutonde rwa shampiyona, ikipe idukurikiye turayirusha amanoata abiri (02); turasabwa gutsinda umukino wa nyuma cyangwa kuwunganya kugirango dutware igikombe, ariko dutsinzwe twakongera kubura igikombe kandi ntitubyifuza ni yo mpamvu tugomba kutirara ahubwo tukagumana morale mu bakinnyi”.

Police handball club iyoboye urutonde rw’agateganyo rwa shampiyona ya handball mu Rwanda ikinwamo n’amakipe 11aho ifite amanota 51 kuri 51 ikaba itaratsindwa, irarusha ikipe iyikurikiye ya APR handball club amanota 02.

Umukino wa nyuma ari nawo uzerekana ikipe yegukana igikombe cya shampiyona uzaba kuri uyu wa gatandatu taliki ya 08 nzeri 2018 ku kibuga cya Kimisagara, ukazahuza ikipe ya Police handball club na APR handball club; aya makipe akunze iteka kuba ari nayo ahanganye cyane muri iyi shampiyona bityo izitwara neza ikazaba ari nayo izegukana iki gikombe cya shampiyona y’u Rwanda ya handball muri uyu mwaka.

 

1,415 total views, 1 views today

Spread this story

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *