Iyobera ku irengero ry’imyijima, impyiko n’iferi by’ibitambo bya Eid Al Adha mu Rwanda

Igihe.com.

Ku munsi wa Eid Al Adha, Umuryango w’Abayisilamu mu Rwanda, uhuriza hamwe amatungo nk’inka, ihene n’intama, aba yaratanzwe n’abayisilamu batandukanye barimo n’abaterankunga.

Aya matungo arabagwa nk’igitambo agahabwa abayisilamu batishoboye, bibuka uko Aburahamu yari agiye gutamba umwana we w’ikinege, agashumbushwa intama akaba ari yo atamba.

Icyakora bamwe mu bayisilamu mu Rwanda bibaza impamvu muri uyu muhango hari bimwe mu bice by’amatungo yabazwe birimo; inyama z’imyijima, impyiko, iferi, imitwe bidatangwa kandi bitabujijwe, bagakeka ko bigurishwa kandi ari ibitambo.

Abaganiriye na IGIHE, bashinja aba-Sheikh kugurisha izo nyama ku bacuruzi bazo kuko usanga zihenda kuruta izindi batanga. Nk’inyama y’iferi ikilo kigura 4000 Frw, mu gihe izindi ari 2000 Frw.

Muneza Abdoul wo mu Biryogo mu Murenge wa Nyarugenge, yagize ati “Muzatubarize aho imyijima n’impyiko n’ibihanga by’izo nka n’ihene biba byabazwe bishyirwa, kuko byo mu nyama zitangwa ntibijya bigaragara.”

Mukeshimana Zawadi yakomeje agira ati “None se ko baba babaze nk’inka 1000 n’ihene nyinshi, kuki nta mitwe yazo tubona cyangwa iyo myijima, impyiko cyangwa ibifu?”

Hari n’abibaza aho impu z’aya matungo zijya.

Umujyanama wa Mufti w’u Rwanda, Sheikh Mbarushimana Sulaiman, yemeza ko iki kibazo cyabagaho ariko Umuryango w’Abayisilamu mu Rwanda (RMC), wagikemuye.

Ati “Turabizi ibyo byabagaho mbere ababaga bayoboye icyo gikorwa barabigurishaga ariko ubu RMC yashyizeho itsinda ry’inyangamugayo ririmo aba Imam n’aba-Sheikh, babikurikirana kugira ngo ayo makosa atazongera kubaho ukundi.”

Ntiyemeranya n’abavuga ko aba-Sheikh bagurishaga izo nyama, ko ahubwo ari ababaga bashinzwe icyo gikorwa bacaga mu rihumye abayobozi bakazigurisha.

Nubwo avuga ko iki kibazo cyavugutiwe umuti, kuri uyu wa Kabiri ku munsi wa Eid Al Adha, cyongeye kuvugwa.

Umwe mu ba Imam bakorera mu Karere ka Nyarugenge utarashatse ko izina rye ritangazwa, avuga ko mu nyama bahawe ngo bazihe abatishoboye nta myijima n’impyiko zarimo.

Yagize ati “Ntabwo nakubeshya mu nyama duha abantu akenshi na kenshi nta myijima n’impyiko biba birimo, inyama y’iferi yo sinkizi ku buryo navuga ko ntayibonye cyangwa nayibonye .”

Biteganyijwe ko uyu mwaka Umuryango w’Abayisilamu mu Rwanda, uzatanga ibitambo birimo inka zigera ku 1000 n’ihene 2000, mu bice bitandukanye by’igihugu.

 

171 total views, 1 views today

Spread this story

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *