Gakenke: Imyaka ine irirenze bategereje ingurane y’ahazubakwa akarere

Igihe.com

Imiryango 22 ituye mu Murenge wa Gakenke, ahazubakwa ibiro by’Akarere ka Gakenke, ivuga ko hashize imyaka ine bategereje ingurane y’ubutaka bwabo bemerewe n’akarere.

Aba baturage bavuga ko babaruwe mu 2014, ariko kugeza ubu batarabona ingurane kandi baranabujijwe kugira icyo bakorera ku butaka bwabo, uretse kubuhingamo imyaka yerera igihe gito.

Umwe muri bo Nsanzimana John, avuga ko gutinda kwishyurwa byabateje igihombo gikomeye.

Ati ‘‘Nta kintu na kimwe twemerewe gukorera ku butaka bwacu kandi twategereje ko batwishyura turaheba, ntiwanabona n’undi mukiriya ngo akugirire kuko barangije kutubarira’’.

Umunyamabanga Nshingwabikorwa w’Umurenge wa Gakenke, Cyubahiro Félicien, yabwiye IGIHE ko icyo aba baturage batemerewe ari ukubaka, kereka gusana inzu bitongera agaciro ka yo kuko babariwe.

Ati ‘‘Icyo batemerewe gukorera ku butaka bwabo ni ibintu biramba nko kubaka cyangwa guhinga imyaka itinda kwera kuko mu minsi ya vuba abujuje ibisabwa bazatangira kwishyurwa”.

Umukozi ushinzwe kugenzura imyubakire n’igenagaciro mu Karere ka Gakenke, Mpabanzi Valens, avuga ko amalisiti y’abujuje ibisabwa yarangije gukorwa ku buryo muri iki cyumweru bose bazishyurwa.

Yagize ati ‘‘Icyiciro cya mbere cy’abagomba kwishyurwa, dosiye zabo zamaze kugera ku bashinzwe kwishyura muri iki cyumweru bamwe bazayabona.’’

Abaturage bose hamwe bazishyurwa amafaranga y’u Rwanda agera kuri miliyoni 177.

Mpabanzi avuga ko aba baturage bazishyurwa mu byiciro bibiri by’ingengo y’imari ya 2018-2019 kuva muri Nyakanga kugeza mu Ukuboza, abandi bakazishyurwa mu ngengo y’imari ivuguruye.

Itegeko rigenga imitangire y’ingurane ku mitungo itimukanwa mu ngingo ya 24 n’iya 28, rivuga ko uwabariwe atagomba kurenza amezi ane atishyuwe nyuma y’aho inzego zibishinzwe zibyemereje.

Iyo icyo gihe kirenze, ku gaciro k’imitungo ye hiyongeraho 5% y’indishyi y’ubukererwe abarwa buri mwaka, icyo gihe kandi ntigishobora kurenza imyaka ibiri.

438 total views, 1 views today

Spread this story

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *