Urubyiruko rukwiye kwigira ku mateka ya Jenoside hifashishijwe abanditsi b’ibitabo, CP Dr Nyamwasa

THE INSPIRER.

Komiseri wa Polisi, Dr Daniel Nyamwasa ngo asanga urubyiruko rukwiye kwigira ku mateka ya Jenoside yakorewe Abatutsi mu 1994 basoma ibitabo byanditswe biyivugaho ndetse bakanagerageza kwandika ibyabo bwite.

Ubu butumwa CP Dr Nyamwasa yabutanze ku mugoroba wo kuwa Gatandatu tariki 14 Mata 2018 muri Kigali Convention Centre ubwo yamurikaga ku mugaragaro igitabo cye yise ‘Le Mal Rwandais: De la racine au paroxysme du Genocide des Tutsi’binyuze mu gikorwa cyiswe Kwibuka24 Café Littéraire.

Ibiganiro biherekeje iki gikorwa kandi byitabiriwe na Madamu Jeannette Kagame.

Madamu Jeannette Kagame ari kumwe na Minisitiri w’Umuco na Siporo, Uwacu Julienne (ibumoso) n’Umunyamabanga Nshingwabikorwa wa Komisiyo y’Igihugu yo Kurwanya Jenoside, Dr Bizimana Jean Damascène (iburyo).

CP Dr Nyamwasa wavutse mu 1957, yasobanuye ko mu byamuteye kwandika iki gitabo harimo uko nyuma y’imyaka ibiri avutse yatangiye ubuzima bw’ubuhunzi kuko ababyeyi be bamuhunganye bamuhetse bakajya mu Burundi, kugeza ubwo nyuma y’imyaka 30 yaje gufatanya n’abandi kubohora igihugu.

Yabwiye urubyiruko ko mu myaka irenga 30 y’ubuhunzi yababajwe no kubaho atagira igihugu, arusaba kubakira ku byagezweho no guhora rwiteguye kwitangira igihugu no kugikorera.

Yagize ati “Icyambabaje mu myaka 31 nibaza ngo njyewe ndi iki mu bandi kuko aho wageraga wasangaga utari umwenegihugu ugasanga utari n’umunyarwanda mbese ukabura inkomoko. Bituma nibaza ngo kuki ari njye na mugenzi wanjye twahunze?”

Mu gitabo cye asobanura uko abanyarwanda babanye imyaka irenga 800 bahana inka, basangiye amasambu, bashyingirana ariko bagashwana umunsi umwe. Indi mpamvu ni ugusobanura uko jenoside yabaye mu Rwanda amahanga arebera ariko Inkotanyi zidafite umubare uhagije n’ibikoresho zigashobora kuyihagarika.

Komiseri wa Polisi, Dr Daniel Nyamwasa, wamuritse ku mugaragaro igitabo yise ‘Le Mal Rwandais: De la racine au paroxysme du Genocide des Tutsi’

CP Dr Daniel Nyamwasa avuga ko yashatse ko umwana uzavuka azamenya ukuri ku mateka y’u Rwanda ndetse n’utari mu Rwanda akakumenya. Yasabye urubyiruko kugira umuco wo kwandika no gukomeza kuba umwe.

Ati “Abana bakwiye kumva ko u Rwanda ari Umunyarwanda. Nitwemera kuba hamwe tukaba ikintu kinini tuzabaho neza, nitwemera kubaho ubuce tuzaba turi kwiyangiza. Abana ndabasaba ko bakomeza kwibumbira hamwe muri ya nyabutatu y’Abanyarwanda.”

Umuyobozi wa Polisi y’Igihugu, IGP Emmanuel Gasana, yabwiye urubyiruko ko mu rugamba rwo kubohora igihugu Perezida Kagame, yari kumwe n’Inkotanyi bikazitera umuhate bigatuma zikora ibikorwa bikomeye byo gutsinda urugamba no guhagarika jenoside zititaye ku mubare muto wazo ugereranyije n’abo barwanaga.

Yakomeje avuga ko kimwe n’ibimaze gukorwa mu rugamba rwo kubaka igihugu ari ‘amasomo urubyiruko rukwiye kwiga, rugakuramo intambwe rwatera kugira ngo ibyakozwe byose bidapfa ubusa cyangwa ngo habemo icyuho.’

Ibi biganiro bitegurwa na Komisiyo y’Igihugu yo Kurwanya Jenoside (CNLG) ifatanyije n’Isomero ry’Igihugu. Umunyamabanga Nshingwabikorwa wa CNLG, Dr Bizimana Jean Damascène, yasobanuye ko urubyiruko rwitabwaho kuko ari rwo rukeneye kumenya cyane amateka no kuyigiraho kandi bigatuma narwo rutinyuka rukandika.

Umunyamabanga Nshingwabikorwa wa CNLG, Dr Bizimana Jean Damascène, yasobanuye ko urubyiruko rwitabwaho kuko ari rwo rukeneye kumenya cyane amateka no kuyigiraho kandi bigatuma narwo rutinyuka rukandika.

Muri aya mezi atatu [Mata, Gicurasi, Kamena ] hari gahunda yo gukora iki gikorwa gihuza abanditsi n’urubyiruko muri za Kaminuza zose n’amashuri makuru, aho urubyiruko rwo muri Campus 46 ruzaganirizwa.

Igitabo ya CP Dr Daniel Nyamwasa, kiraboneka muri Librairie Ikirezi, Caritas, ku rwibutso rwa Jenoside rwa Kigali, mu ngoro y’amateka ya Jenoside yakorewe Abatutsi mu 1994 no kuri internet, kikaba kigura amayero 17 ni ukuvuga ibihumbi 17 by’amafaranga y’u Rwanda. Cyanditse mu Gifaransa aho kizashyirwa no mu Cyongereza.

 

 

288 total views, 1 views today

Spread this story

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *